المهم ... بقلم الكاتب المبدع الأستاذ / عوّاد المخرازي

المهم
اليوم طلعت جنب بيتي اتمشى . كان في معسكر للجيش جنب حارتنا  رحل .و ترك النا منطقة جميلة صراحة كلها شجر . وصارت الناس تطلع هي واولادها عليه تتنزه والشجر  بالمفرق قليل. لما صرت بنص المعسكر تفاجأت انو في حد قطع بعض اشجار السرو الكبيرة من يوم بس. وقديش هالشي آلمني. يعني تقطع شجرة عمرها اربعين سنة عشان تحرقها بساعة او تبيعها بعشرين دينار . يعني منظر الشجر والطيور والاطفال وهي تلعب تحته  ما بيتساوى بكنوز الدنيا كلها . رجعت البيت وانا مهموم وتعبان جدا من الي شفته .

تذكرت من كم سنة زرت ابن عمي بالحماد على الحدود السعودية العراقية مع غنمه ساكن ببيت شعر بسيط. وكان عنده جار واحد بس بعيد عنه ممكن اثنين كيلو . كان يجمع عبوات المي عشان يحرقها وهو كل اسبوع يروح يوم على الرويشد الي تبعد عن بيت الشعر تبعه مية وعشرة كيلو فيجيب مية صحة بكميات كبيرة عشان تكفيهم للشرب . فيجمع الفاضي ويحرقه سالته ليش تعمل هيك؟ ما في حد حواليك؟ وبعدين هاي ما تأذي الغنم يعني ما توكلها ؟ولو اجت الريح تطيرها شرق على العراق .فهو بالكاد يقرا ويكتب سكت وما عرف شو يجاوب .بعدين قال الي :عشان عيب ..
وبعدها بيوم شفت جاره الختيار شايل شتلة نخل لقاها طالعة بوادي فحملها وراح يزرعها على بركة دبادب وهي بعيدة ممكن خمسين كيلو .عشان بركة دبادب فيها مي طول السنة . سالته ليش تعمل هيك يا حاج .صمت وما عرف شو يجاوب وبعدين قال : خطية بلكي تعيش جنب المي ..
تذكرت كيف اول ما وعيت على الدنيا بالحماد بالصحراء كيف كانت الشطوط تتملى مي بالربيع وكنا نشم ريحة الشيح والقيصوم والنفل من مسافة عشرة كيلو.  لما نرد على المي كنا نعبي مي ونحطها ببراميل ونرمي فيها قطعة ' "شبة"  فتصير المي صافية . وكيف هالشط الي امتلى مي والي هو _بحجم مدينة قد مدينة اربد _ تشوف عشرات الآلاف من طيور القطا والحجل تطير فوقه واعشاشها حول شط المي من كثر البيض ما تقدر تمشي بينها. كنا نجمع البيض بسطل حديد واحنا صغار ونكون فرحانين عشان تقليه النا امي. تذكرت طيور الكركي وهي بتطير بالالاف  فوقنا .غير الارانب البرية والفري . وكيف كان الاردن جميل. من سنين طويلة بطلت الشطوط تتعبى مي وبطلنا نشوف الطيور والارانب. عشان كل ما تمشي كم كيلو تلقى قزايز الوسكي والعرق واماكن خيم . وصار كثير من الشباب يجو من المدن والقرى يطلعوا البر بسيارات حديثة تلقاهم طول الليل يطاردو ارنب صغير يصيدوه و يصرفوا مية دينار بنزين عشان يتصوروا معه وينشرو بالفيس ويقولوا انهم كانوا بالقنيص كونهم فرسان وهم ما بيميزوا الحصان من البغل. ما تركو طير الا طخو عليه وما تركوا كركي بالسما الا طخوه والنتيجة امحلت الارض وبطلنا نشوف هالطيور نهائي بهالصحرا.
قبل عامين  شفت بغابات برقش الي بعحلون شباب راكبين سيارت حديثة ولابسين ملابس فاخرة وهم يقطعوا شجر البلوط وبحطوه بصندوق السيارة واشكالهم تدل على انهم متعلمين ومثقفين . تذكرت كيف كل الناس ترمي الزبالة جنب الحاوية. كيف سرقنا حق الطرقات من العطاءات . كيف دمرنا كل مؤسسات الدولة وكيف دمرنا التعليم . انتشرت السرقة والنصب والاحتيال .التحرش على اسوار بنات المدارس .الاخلاق انحطت ببلدنا. اللحم يغشوه واللبن يغشوه والخضار والفواكه يغشوها. أطنان لحمة فاسدة واطنان مرتديلا واطنان جبنة ومخللات ترميها الدولة كل يوم وتتلفها .الشوارع فوضى ومكسرة والاسواق خبيصة . ما تقدر تركب مواصلات عامة ولا تتعالج بمركز صحي للدولة .كيف الجاهل هو صاحب القلم والحرامي هو المسؤول والشريف هو المسجون .امتلت البلد مخدرات وعنف وحالات انتحار  وصرنا كأننا بسجن الاكتراز الامريكي. معقول الاردن الي تفوق على كل الشرق الاوسط بالتعليم تكون هاي حالته. معقول مئات الالاف من الشهادات العلمية وبالأخر تشعر كانك عايش بعصور ما قبل الجاهلية. والله حتى العرب بجاهليتهم كانوا متحضرين اكثر منا الان.
تذكرت كيف كنت احكي لابني الصغير ما توسخ الاردن لما يرمي محرمته على الارض. واعلمه ان الاردن مقدس هو امنا الي نعيش بحضنها. وكيف كان يرجع البيت زعلان : بابا الاولاد اليوم بالمدرسة وسخوا الاردن . ويحكي الي كيف زملاءه يضحكو عليه عشان قال الهم انتو وسختو الاردن.
 لما توفى ابوي ماتت ثاني يوم الشجرات الي زرعهم .وجارنا كمان صار لشجره نفس الشي لما توفى .وكنت احكي للناس والمثقفين دايما انو الشجر يحب ويكره مثل الانسان وبيشوف كمان وكانوا يضحكوا مني . حتى مهندسي الزراعة ما بيصدقوا هالشي . حكيت الهم عن تجارب الامريكان وكيف صوروا هالشي وعملوا تجارب واثبتوا ان الشجر يحب ويكره ويبكي ويعرف الاشخاص كمان . وما حد بيصدق..
وتذكرت الشجرة الي بكت ورا رسول الله صلى الله عليه وسلم وشافها كل الصحابة ..

     كنت كل كم يوم اروح على غابة المعسكر انا واولادي حتى يتمرجحوا تحت الشجر ويلعبوا . وكانت تمر المسا غربان كثيرة من فوقنا . ترجع لاعشاشها باخر المفرق بالشمال . كانوا الصغار يعدوها كل يوم ويستمتعوا باصواتها . اليوم طلعنا هناك انا وعائلتي واحنا موجوعين على هالشجر.. وصار اشي غريب ممكن ما حد يصدقه. الغربان وقفت مقابل الاشجار المقطوعة لاول مرة. وصمتت لدقائق وبعدها طارت. هي اكيد شعرت باختفاء اشجار السرو مثلنا مع انها عمرها ما وقفت عليهم. ممكن كانت تعمل محاكمة للمجرم الي قطع هالشجرات. وممكن قررت انها تهاجر من هالبلد.
هو شو الي صاير وخلى كل الشعب عايز يهاجر ويترك البلد مثل هالغربان . ليش صرنا هيك . معقول راعي الغنم والمتعلم يستاووا بالثقافة وبالوعي. وممكن راعي الغنم تقوده فطرته النقيه وبيضل افضل منا..
انا عمري ما شفت ماسوني ببلدي ولا يهودي يدمر ببلدي ولا سائح اجنبي يوسخ ببلدي. بس شفت علي بابا الي مستوطن بعقولنا وضمائرنا ومش راضي يطلع علي بابا الأناني الي ما بيحب الا نفسه .علي بابا المتنمر واللا مبالي باي اشي . شفته بكل مكان ببلدي . شفته والدولة تعمل مية مطب لسيارته عشان تجبره يخفف سرعته.  شفته وهو مكشر دايم ومعصب دايم والقنوة ما تفارق سيارته . شفته وهو يغش وينهب ويكذب حتى دمرها وصار ينادي انو البشرية كلها تتآمر عليه عشان يدمروه .. والحقيقة ما دمر بلدنا  حدا غريب ما دمرنا الا علي بابا الي ساكن بعقولنا وضميرنا هو واشكاله وهذا الزم الي ......قطع شجر السرو.
           عواد المخرازي ٢٩/١٠/٢٠١٩