البصارة بقلمي محمود عجور
قالتلي البصارة
حط كفك بكفي
تشوف طريقك
لوين بكفي
كتر الكلام
ما عاد بكفي
هات إيدك
وكلامي أنا بكفي
يابني خطوط كفك
فيها الدني دواره
زواريب
وألف باب للحارة
الفرح فيها يومين
وباقي أيامها قهارة
شايفة بعيونك صبية
الحلا فيها دايب
ملبكي ومستحية
حكاية عشق
القطبة فيها مختفية
رواية هالدني
أنوارها مطفية
يا بصارة
حاجي بكفي
من لمسة كفك
رجف كفي
ومن دقة قلبك
صار قلبي عكفي
بكيت البصارة
ودموعها عالخد سخية
يابني
أنا البنت الصبية
رواية هالزمان
أحلامها منسية
وأنا القطبة الحزينة
بدروب الزمان
تايهة ومختفية
No comments:
Post a Comment