إخلاص
***
بتغضب ليه وتشكيني لكل الناس ؟
دانا كُلي وتكويني ملاك حساس
لو الأحجار بتتكلم هتحكيلك حيطان بيتنا
بدقة قلب مكسورة ودمعة تدوب ف شمعتنا
وزيي لو هتتألم خلاص إنساها قصتنا
وروح إعند كمان إبعد ياناسي ايام محبتنا
وتغضب ليه وتشكيني لكل الناس
دى أيامي ونور عينى عليك حراس
*
مانِيش قادر أقول عنك دا كان غلطان
في حرف نقشته من إسمك ليالي زمان
دا صحاني وخلاني لنا نايم ولا سهران
أقوم أجري أناديلك وأمسح دمعتك بحنان
ليه تغضب ليه وتشكيني لكل الناس
أنا ف بُعدك مليش بَعدك خِلصت خلاص
*
تكون ناسي يا روح قلبي حكاوينا فى كل مكان
ورعشة حب مجنونة بترسم للزمن ألوان
أنا قلبي ملوش غيرك وقلبك من حجر صوان
بتهجرني وتنساني وتفتح صفحة الأحزان
ومن تاني بتجرحني وتشكيني لكل الناس
ولما تصب تسقيني مرارة الكاس
*
آهاتي من الوجع صحِت يمامة بالجناح مكسور
بتتحامل على جراحها تقول عشك ماهوش مهجور
أنا حُبك ومش عايزة على عمري أطفي النور
تعالى نصحصح الماضي نروح بيتنا نعلي السور
ولا تغضب وتشكينى لكل الناس
ودندن إسمى وحروفه أنا الإخلاص
***
°ˆ~*¤®§(*§ عادل شاكر §*)§®¤*~ˆ°
No comments:
Post a Comment