جواز سفر
جواز سفر وتذكرة
وشاب مليان بالأمل
وخمسة ستة من الجيران
جايين يباركوا ع السفر
ويحلّفوه يبعت لهم
لمّا يروح
عقود عمل
عيون بلهفة مدمّعين
وقلوب بحب مودّعين
وعهود بتفرض نفسها
مين قال لها
أن الليلة دي وداع حزين
واقفاله ع البلكونه قال
دي أصلها بنت الحلال
اللي بتحلف انها
تفضل كده مستنياه
وناويه تحفظ عهدها
شهرين تلاته وبعدها
تمشي الحياه
قلب البنات بقى مفتري
بيدق مع أول ثري
هايدق باب
أمّا الشباب
الهبل دول متعلّقين
ف حبال هوا
بيقوم يلفّ على الخوا
ومابيلاقيش
مين اللي بيسمّي العذاب ده
أكل عيش
بقى حلمه لقمه تسد جوف
ملعون أبو كل الظروف
ملعون يا خوف
فرحان عشان تأشيرة
خدها ع الجواز
هايبيع سنين عمره بشقه
وكام جهاز
ومعاها أمراض مزمنة
يادي الهنا
كيس العلاج
مابقاش يفارق
شنطته
والصحة أغلى م الدهب
ياللعجب
لسّاها في البلكونه
واقفه وحدها
بقا عندها
بنوته حلوه تتخطب
مستر عادل أبو زيد
No comments:
Post a Comment