محدش فيها مرتاح
حتى اللي رزقه براح
فيها الفقير يتمنى
قصر ونعيم فواح
واللي ربح واستغنى
عايز يزيد أرباح
واللي عايش يتهنى
نفسه فى شباب ملاح
وابو العيال صدعنا
بالشكوى م الأطراح
جاره زهق يستنى
مراته تجيب له صلاح
مريض وهز قلوبنا
أنين مسا وصباح
وأنيس قاعد على القهوة
والعطلة سيف دباح
مستنى الدهب فى المنجى
والدنيا تشتى فراخ
والطامة نص شبابنا
قاضيها عويل وصراخ
همه يقل منامنا
رافضين لنا استنساخ
واللي حكم كام دولة
حلمه العالم يجتاح
خسران خسر كام جولة
زي الحريم رداح
وصاحب الكلام والفتوى
رأيه حياة ومناخ
واللي اتلسع م الشوربة
خلاص هيشوى فراخ
داللى رقص ع السلم
عاش الحياة مداح
و اللي وصل للقمة
أخره تراب ونواح
هي الحياة كام جولة
للى واخدها كفاح
واللي لحبيبه غنى
مات الحبيب أو شاخ
لا في قصر تبقى جنة
ولا الجحيم فى اكواخ
ختم العمل يا اخوانا
بالخير نعيم وافراح
رضا العليم باحوالنا
خلى الفؤاد يرتاح
........وائل سعيد......
No comments:
Post a Comment