صرخة و دمعة عين ... بقلم الكاتب المبدع الأستاذ / سليم أحمد حسن

صــرخة ودمعة عــين .. [ 2 ]

المستشار د. سليم أحمـد حسـن ـ الأردن

********************************

[ قـصـة حقـيقيـة .. حدثـت في الأردن ذات سـنة

أثناء تقديم امتحانات الثانوية العامة - التوجيهي -

وهي باللهجة الأردنيـــــــة المحكيــّة .. ]

****

خايفةْ ، أنا يمـّا .. ضُميني في صدركْ.. خبِّــيـني في حضنكْ ..

احميـــني يمــّا الموت بِسْـــتنى .. واقف على جنـــب الطريق ،

صيـّاد ما عندو نظر ، سِكينو بقْـطر دم ، وعيونه مليانه خطر ..

ودروبو هـــمّْ وغـمّْ ، ماشيها حــزين ،

عُـمرو مَ فـرّق بين عدو وبين صديق ،

ولا عمروعرف الحب أو طعم الحنان ..

أو عمرو ساب الناس تحيـا في أمان !

يا ريت يعرف قيمة الإنسان ..ويخـلـّي كل الناس تحيا في أمان .

****

كنــّا يا إمي أربعة فوق الصيف ماشيين ..

ليلى ، وسعاد ، وفادية ، وبنْتك شيرين ،

لمــّا الصُبح شفتينا باب الدار ..قلتي ، مـا شا الله ،

صرتو عرايس .. يا بنات كبار ! روحوا بحفظ الله محــروسين .

كنــّا يا إمي المدرسة رايحين ..بعيونـّا نظرة أمل ..

وبقلوبنا شـوّيـة قلق خايفين .. اليوم أوّل امتحان ..

توجيهي ، تقرير المصير .. وبعدو إلى بــرّ الأمـــان .

****

كنـــّا يا إمّي ماشيين .. سعاد تسأل .. وفادية تعطي جواب ،

تعليق من ليلى .. وضحكة من شيرين .

وفجأة مثل لمح الصر .. مثل القدر ..سيّارة طلعت عَ الرصيف ..

إعصار مخيف .. وطرنا يا إمي بالهوى ..

وما عدنا نعرف شو جرى ، أو إحنا فين ..!

****

الحمد إلكْ يا ربْ .. والشكر الكْ يا ربْ ..

لا تخافي يمـّا .. لا تخافوا يا أحلى البنات ،

الله حارسكم بيحميكم ، والامتحان ما ضاع ،

اللجنة .. بعد شـوَي تيجيكم ..

****

لكن ، خلـــّوني أنده ، خلــوني أصرخ ..

يا خلق .. يا ناس ؟! باسم العدالة والضمير والدين ..

باسم الأمومة وخوفها وأحزانها .. باسم الطفولة وحبْها وأحلامها ..

باسم الصبايا والشباب .. أغلى سواعد في الوطن ،

تِـعملْ لخيرو ونهضتو، وتِحمي لَـمجدو وعــزّتو، دايما على طول الزمن .

***

مشـــّان الله ..!وعلشان نحيا الحب راعينا ..والخير تنمو زهرتو فينا ..

لا تســوقوا .. وانتو مسرعين ،

ولا تعــطوا سياراتكم .. لـوْلادكـم لـِـمْـدلّـلــين .!!

خلّوني أصرخ .. ويا ريت كل الناس تسْـمعنا ..

ويا ريــت هالصرخةْ .. تـِفـيـد الســـامعـــــين . ؟!

*************************************